Ń JÉKENE : Pílish á geɗe áaɓay ahəme ?

Ń di n jekene,

Ághal-ghala ngiɗe, pílésh á geɗə kʉɗe-kʉɗe’e, ára mán ngá geɗe ápatsəna. Á dé a n dá gíy vár, ndá zlehe’ á nda ndiya ázəɓay.

Tə n ta’a, mœdœdə ngiɗe á zhé, təpa, dzáh aamán a ngwaziy á ta dé ápa. Ngwaziy n hwasə n dé ápa, ta bazlətə télé.

Dəm biy ngiɗe á zhé, ńzləmbáɗ na Yasama, m mbiy waliy kaɓay, á píy aa diy á ndohay. Á ndəna a n ngura’a, mán n dá vədə maslakə n ngurhay aa va.

Péc ngiɗe á zhé, a m basla giɗ na, mán a n dé á mœdœdə mámatsa, mœdœmə mán ngwaziy tá dé ápa áaɓay árə mágasa. Á dó ápə aa médégéɗ, ágíɗé mán bábəhiy nə ta vanə riya ɓay.

Páts ngiɗe, aa pírék, a m pədə máslaka aava ára ndú n dé aa mə vár, a n tuva aa dəɓə pílésh, á ta dáyi ta a ndá kərə mamahiy na.

A n ndikəta á mœdœdə mámatsa, á fákálaw mœdœdə sá, a n tsíy láláw kátá :
– Wábaw ! Wábaw ! Təvá mbúrókwihiy wuna, ngwáza’ á zhé ! Wa mbálədəta áwudə télé, ágíɗé mán suwɗək aava, ń gideshe á dá ganga á géɗ.

Á nda həldə́ mbúrókwiy sá á ngwiy báy, aamán ndú ń rəka ń ngura təva tə́nga ázəɓay.

Á fakalaw sa a n dana aava n tsíy láláw za gine :
– Wábaw ! Wa mbalədə mbúrókwihiy wuna áwudə télé ! Tá tsukwa súwɗək á wúdam, ń gideshe á dá gánga á géɗ.

Yaw yaw, á ndohiy á ta puza á maya ngiɗe. Á pílish a n gaɗana á Yasama méne :
– Géle vá ! Tá heshə́ maya n sə́naká áva’a, aa na. Mán ta dá vakə́ yam á ka pénə́ vá, ká dá cʉ́ n ɗúfa ɓay. Ta dá vakə́ zlúwéɗ, ká dá ndáw ń ta ɓay.

Yasama ntsə́nána á géɗ á tsavəl pílish nə ɓay. Teɗeɗe’ a n gáw sukwiy télé árə mán á njena. A m mbə́ləna áwúda tə ɓaliy ndohiy sá.

Ayi tə mán ndul á ta shike ádəɓa á ngwáy, á ndohiy wúdəm sá, á ta jʉmə mán á tá píy géɗ tə n híy aa pílishhay.

Tə m piy giɗ wuna, Yasama n ndata á giɗ télé. Ahəsátá a n gədəká wu na áwuda, a n ngərdatə mán ngwáza’a.

Á nda fakata aama, aamán nda gəsatə ɓay. Á fakalaw mœdœdə sá, a n ndədə və na aa yam, aa mba mán a n da lámana, aa na.

Mán yim sa n lámana, á ndəna aa də́láy ára. Ágíɗé n ta, á pílish na, a n hukwa búkwiy na, a n vana á dáy, kátá yam á lámana yawa a n rʉɓe ásaɓay.

Aá ń wufe aa ma, á ta ndikəkáɗəta á ngwáy aá kərə mamahiy na.

Tə mán bábə na á dzuhwaɗə təriy na, mán á gaka ké tə jehngel nə ke, a n njena á bábə na mán nə́nga sə́táɗ a n tsaká gáda aa giɗ tə́nga télé, pílish n ga sukwa kwá sə́táɗ ɓay, aa na.

Á pilésh a n dana aava n kuɗáy, dəga páts n ta, a n ndala n geɗe aagiɗə sukwiy mán ngwáz sá á njœ.

❧ Ńjékenə jékenə kala á giɗ wúdám.

Ńjékenə ndohiy ńtə Mali